Die Milnerton Rommelmark

‘n Rommelmark is nie net ou goed nie.  ‘n Rommelmark is mense, hulle wat ou goeters verkoop.  Die ou goed self is meeslepend… boeke wat oupa sou gelees het; gereedskap van iemand se garage;  borde;  meubels; ‘n déco-radio; ‘n verweerde Boeddha;  ‘n Afrika-masker;  eetgerei; speelgoed; plate uit die jare Sewentig;  ‘n skildery van Tafelberg;  ‘n klein Eiffel-toring; ‘n leergordel met sakkies vir patrone; lampskerms; stewels; muntstukke uit die jare Sestig… die lys strek die verre in.

Kontraste

Kontraste

En daar is ook ‘n boereworsstalletjie want mense word honger terwyl hulle winskopies uitsnuffel.  En ‘n rommelmark is mense.

Boemelaar

Boemelaar

My vriend Douglas bieg:  my swakheid, sê hy, is hierdie rommelmark… die goed; die mense.  Ek troos: dit kon érger.  Hy is al meer as ‘n dekade verslaaf, elke Saterdagoggend vroeg, om  gemoedelik saam te wedywer vir die beste winskopies en dit ook wat nie winskopie is nie, maar wel ‘n rare vonds wat hy sommer hou, tot sy vrou se ergenis.

 Maskers

Maskers

Hy snuffel nie net ou goed deur nie;  hy snuffel die mense én hul geskiedenis deur.  Hy stel my voor.  Dit is Boris (nie sy regte naam nie); hy kom uit die Krim uit, met ‘n Engelse woordeskat wat meestal uit vierletterwoorde bestaan.  Dit is Harry.  Later vertel hy my dat Harry ‘n afgetrede priester is met ‘n massiewe versameling van kruise.  Dit is wat hy op die vlooimark kom soek.

Speelgoed

Speelgoed

Laat ek jou aan Devon voorstel en sy elektrostatiese humorsin.  Dit is Mynie … en (fluisterend) haar een been gee nou in… haar man is onlangs aan kanker oorlede… Die kronieke van die mens.

Die wind toon ons geen respek.  Seildekkings klap.  Die wolke oor Tafelbaai is krulhale.  In die kartonbokse, tomatiekisse, op die teerblad uitgestal, is die brokke van lewens wat elders gevoer is.  Jy skuil agter jou eie oordeel van die nuttigheid van ‘n objek, eerder as om te dink dat eendag sal jou lewe ook hier uitgestal word vir snuffelende vingers.  Filosofies was ek tussen die uitstaltafeltjies, kombis, motors… ‘n Okerkleurige trein grom verby op die spoorlyn wat digby lê.  Die wind stribbel teë.  Kom’s skep ‘n koppie moerkoffie, pluk Douglas aan my mou.  En … die Poolse vrou het sjokolade croissants wat sy daar bak.

Wolke oor Tafelbaai

Wolke oor Tafelbaai

Saterdag 30 Maart 2013

www.loertoer.wordpress.com

Beelde:  Willem

Advertisements

Tagged: , , , , , , , , , , , ,

One thought on “Die Milnerton Rommelmark

  1. Teresa Denton July 16, 2013 at 10:53 am Reply

    Ek is nou op die stadium dat ek ontsla wil raak van al die rommel wat ek opgegaar het deur die jare! Niks meer nie aseblief!!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: